Mª Antonia ROSALES SANTIAGO

UNHA MULLER EXCEPCIONAL

Neste 8 de marzo de 2024, día Internacional da Muller, antes día da Muller Traballadora, quero lembrar unha muller, traballadora incansable e moi especial, Toñi, que ven de deixarnos, como non podía ser doutra maneira polo moito amor que nos deixou, o derradeiro 14 de febreiro, o día das e dos Namorados.

Non se trata dunha persoa famosa, ilustrada, que fixera algo grande e con moita sona, senón que ela facía as cousas básicas da vida cunha intelixencia innata que se traslucía polo súa grande capacidade de adaptación aos avatares da vida.

O 26 de xaneiro de 1953 nacían nunha aldea de Marín, na provincia de Pontevedra, dúas irmás xemelgas, Carmen e Mª Antonia. Carmen deixou soa a Toñi ao cabo dun ano por mor dunha meninxite. Toñi a partir de entón sempre sentiu que lle faltaba a súa outra metade.

Despois viñeron moitos máis fillos e fillas e Toñi, como irmá maior, sendo o pai pescador e estando todo o día no mar, e a súa nai vendendo o peixe polas aldeas e secando cazapas, tivo que deixar ben cedo a escola, que tanto lle gustaba, e coidar da casa e sobre todo do seu irmán e da súa irmá pequenos.

Máis tarde traballou en moitos oficios, xa de pequena nunha conserveira, e despois converteuse nuha profesional da limpeza e dos coidados; tanto cosía un botón, regaba as plantas ou facía a comida como axudaba facendo máis doados os últimos tempos das persoas dependentes das que coidaba, que foron moitas. Tamén sabía de cans, tivera dous pastores!

Casou e tivo unha filla e un fillo, os seus dous grandes amores, da e do que se sentía moi orgullosa e feliz. 

Toñi era unha muller guapa por fora, aínda que nunca utilizou a súa beleza para ningún fin, pero sobre todo a súa beleza estaba no seu interior. Era alegre, a pesar dos malos tragos da vida, sempre estaba de bo humor e presta a soltar unha gargallada. 

Valente, moderna, actual, ao día do que pasaba no mundo e no seu entorno, aceptaba as cousas tal como viñan, sen dobreces, sempre desposta a solucionar todos os problemas, sen pensar nela; primeiro estaban as outras persoas. Pero por iso non deixou de desfrutar da súa vida.

Coñecímonos hai máis de 18 anos cando eu necesitaba de alguén para compaxinar as tarefas domésticas e o meu traballo, e ela quería manterse por ela mesma sen depender de ninguén. Ao longo de todo este tempo, mesmo despois de estar ambas as dúas xubiladas, falabamos case todos os días. Comentabamos as novas que xurdían sen deixar de lado as nosas propias inquedanzas. E pouco a pouco fixémonos amigas.

Que sería da nosa vida sen Toñi ou outras persoas coma Toñi que se ocupan das cousas aparentemente simples, pero as máis trascendentais da vida, cociñar, limpar, lavar,... e fundamentalmente coidar, escoitar e dar cariño!?. 

Reivindicar de paso neste día a importancia dos coidados, tradicionalmente levados a cabo por mulleres, moi pouco e moi mal pagados e moito menos recoñecidos, e avogar pola corresponsabilidade entre homes e mulleres.

Para máis información pódese preguntar á súa familia, ás súas amizades e a calquera das moitas persoas que a coñecimos e que gardamos dela a imaxe dunha muller excepcional. Un exemplo a seguir!

FEMINISTAS RADICAIS

FEMINISMO RADICAL

Este feminismo proponse buscar a raíz da dominación. Polo tanto oponse radicalmente ao patriarcado como causa da organización política e social existente. Non propón unha reforma do patriarcado senón a eliminación ou a súa supresión total.

Diferénzase do feminismo liberal porque este só pide a integración das mulleres no mundo do traballo asalariado e da cultura e de todos os ámbitos da vida pública tal cal os coñecemos, coas súas mesmas regras. Para as feministas radicais, polo contrario, mellorar a condición das mulleres implica moito máis que a incorporación feminina ao espazo público.

A modo de síntese, as feministas radicais teñen como obxectivos de loita: 

• retomar o control sexual e reprodutivo das mulleres 
• aumentar o seu poder económico, social e cultural
• destruír as xerarquías e a supremacía da ciencia
• crear organizacións non xerárquicas, solidarias e horizontais (Gamba, 2008).

Pronúncianse polo feminismo da diferenza, que propón unha revalorización do feminino, formulando unha oposición radical á cultura patriarcal e a todas as formas de poder, rexeitan a organización, a racionalidade e o discurso masculino (Jaggar, 1983).

O feminismo radical orixinouse nos movementos contestatarios dos Estados Unidos de América nos anos sesenta do século XX. A diferenza das súas compañeiras feministas, as radicais apartáronse para fundar o Movemento de Liberación da Muller, sostendo que a opresión das mulleres é a opresión primaria, transversal a todas as opresións que derivan do patriarcado.

Este feminismo non é reformista porque o patriarcado non se pode reformar senón só abolir. A súa abolición é o que busca o feminismo radical e con iso, toda forma de discriminación contra as mulleres como a violación, a prostitución ou a pornografía.

Entre outras formas, o cambio no feminismo radical debe facerse a través de estratexias de co-educación que cuestione os roles e normas sexistas.

Desde FeminismoINC, co convencemento  da pertinencia e necesidade de radicalizar (ir á raíz), esta loita, durante todo o 2023,  consistiu na publicación da vida e da obra de 12 feministas emblemáticas desta corrente, cuxo legado e propostas seguen vixentes nos nosos días. Elas son: 

1. Andrea Dworkin (EEUU) 
2. Gerda Lerner (Austria) 
3. Kate Millet (EEUU) 
4. Marcela Lagarde (México) 
5. Amelia Valcárcel (España) 
6. Gioconda Espina (Venezuela) 
7. Chimamanda Ngozi Adichie (Nigeria) 
8. Shulamith Firestone (Canadá) 
9. Celia Amorós (España) 
10. Sheila Jeffreys (Reino Unido) 
11. Rita Segato (Argentina) 
12. Germaine Greer (Australia)

Andrea Dworkin (EEUU) (1946-2005): escritora e activista feminista. Abolicionista da prostitución e a pornografía. Sinalou en varias oportunidades o vencellado que están a pobreza e a violencia cara ás mulleres. "Odiase ao feminismo porque se odia ás mulleres". 

Gerda Lerner (Austria) (1920-2013): Historiadora e profesora universitaria. Investigadora da historia das mulleres e da orixe do patriarcado. "A ignorancia da súa propia historia de loita e logros foi unha das principais formas de manter ás mulleres subordinadas".

Kate Millet (EEUU) (1934-2017): Escritora, artista e activista social. Unha das maiores impulsoras do feminismo radical. "Tal vez non se trate de que o amor en si sexa malo, senón da maneira en que se empregou para engatusar á muller e facela dependente, en todos os sentidos".

Marcela Lagarde (México) (1948-...): Antropóloga, investigadora, política e activista. Foi quen acuñou en español o término "Feminicidio" desde 2006."O que caracteriza ao feminicidio é a impunidade social e do Estado".

Amelia Valcárcel (España) (1950-...): Filósofa, xurista, investigadora, autora, catedrática e membro do Consejo del Estado español desde 2006. Investigou o rol do feminismo na filosofía política e a ética. "O feminismo é humanismo e liberdade".

Gioconda Espina (Venezuela) (1948-...): Psicoanalista, docente, investigadora e activista. "Ningunha conquista duradera das mulleres pola igualdade de dereitos fíxose nunca sen a unidade das que pensan distinto".

Chimamanda Ngozi Adichie (Nigeria) (1977-...): Escritora, profesora y activista feminista.  “Cociñar, e as tarefas domésticas en xeral, son habilidades que idealmente deberían ter tanto homes como mulleres”. “Necesitamos traballar cos homes, ensiñarlles. A masculinidade é unha cousa terrible.”

Shulamith Firestone (Canadá) (1945-2012): Escritora e activista feminista. Abordou a interseccionalidade entre discriminación de xénero, raza, clase social e espazo xeográfico. “O amor, máis quizais que a xestación dos fillos, é o baluarte da opresión das mulleres na actualidade”.

Celia Amorós (España) (1944-...): Filósofa, catedrática, escritora e activista feminista. Analiza o enfoque filosófico do feminismo. “As mulleres non queren o identitario masculino, senón o xenéricamente humano”.

Sheila Jeffreys (Reino Unido) (1948-...): Activista, escritora e ex profesora. “No sexo heterosexual é habitual unha erotización da desigualdade, polo que necesitamos erotizar a igualdade”.

Rita Segato (Argentina) (1951-...): Antropóloga, investigadora, escritora e profesora universitaria. Especializada na análise sobre a violencia baseada no xénero, os feminicidios e o abuso sexual. “Na loita contra a violencia nos encontramos todos os feminismos do mundo”.

Germaine Greer (Australia) (1939-...): Escritora, profesora e activista feminista. Analiza e critica a idea estereotipada da feminidade calificándoa como unha cárcere que impide o total desenvolvemento das mulleres.

FeminismoInc é unha ONG (Venezuela 2015), que traballa polo empoderamento feminino para que máis mulleres accedan ao poder económico, político e social nos seus ámbitos de influencia. Elaborou o pdf "#Feministas Radicales" que pódese descargar na seguinte ligazón Feministas Radicais.